Гадаад харилцааны сайд Б.Батцэцэг Норвегийн Хаант Улсын Инновац Норвег байгууллагад зочилж, тус байгууллагын Дэд ерөнхийлөгч Эва Камерертэй уулзалт хийв.
Уулзалтын үеэр Монгол, Норвегийн аж ахуйн нэгжүүдийн хамтын ажиллагааг өргөжүүлэх боломжийн талаар санал солилцож, тэр дундаа эрчим хүч, сэргээгдэх эрчим хүч, хөдөө аж ахуй, аялал жуулчлал зэрэг салбарт хамтран ажиллах, инновац, шинэ технологийг нэвтрүүлэх, бизнесийн харилцааг дэмжих чиглэлээр хамтын ажиллагааг хөгжүүлэх боломжийн талаар ярилцжээ.
Мөн Монголын аж ахуйн нэгж, стартапуудыг олон улсын, тэр дундаа Европын зах зээлд нэвтрэхэд дэмжлэг үзүүлэх, туршлага судлах боломжийн талаар санал солилцсон байна.
Инновац Норвег нь Норвегийн Засгийн газрын инновац, бизнесийн хөгжлийг дэмжих чиг үүрэг бүхий төрийн өмчит байгууллага бөгөөд гарааны компаниуд болон өсөлтийн боломжтой аж ахуйн нэгжүүдийн өрсөлдөх чадварыг нэмэгдүүлэх, инновацыг хөгжүүлэх замаар олон улсын зах зээлд нэвтрэх боломжийг өргөжүүлэхэд чиглэсэн цогц дэмжлэг үзүүлдэг.
Тус байгууллага нь аж ахуйн нэгжүүдийн мэргэжлийн чадавхыг бэхжүүлэх, дотоод болон олон улсын зах зээлд маркетинг, сурталчилгааны дэмжлэг үзүүлэх, бизнесийн стратегийн зөвлөх үйлчилгээ үзүүлэхийн зэрэгцээ байгууллагууд хоорондын түншлэл, хамтын ажиллагааг хөгжүүлэхэд дэмжлэг үзүүлэн ажилладаг байна.
