АНУ-ын Ерөнхийлөгч Donald Trump өчигдөр “Эхлээд Ираны эсрэг явуулж буй цэргийн ажиллагааг дуусгасны дараа Кубын талаар хэрэгжүүлэх дараагийн үйл ажиллагааны чиглэлийг боловсруулахаар төлөвлөж байна” гэж мэдэгдэв.
Цагаан ордонд болсон ёслолын үеэр тэрбээр АНУ-ын Төрийн нарийн бичгийн дарга Марко Рубиод хандан, “Марко, чи маш гайхамшигтай ажиллаж байгаа шүү. Одоо Кубын асуудал дээр ч гэсэн гайхалтай ажиллана гэж найдаж байна” хэмээн хэлжээ.
Мөн Трамп, Куба гаралтай Рубиод хандан “Чи бусад хүмүүсийн хамт Кубад эргэн очих нь зөвхөн цаг хугацааны асуудал. Гэхдээ тэнд үлдэхийн тулд явахгүй гэж найдаж байна. Бид чамайг буцаж ирээсэй гэж хүсэж байна” гэж хэлсэн байна.
Үүний зэрэгцээ тэрбээр Венесуэл дэх нөхцөл байдлын талаар байр сууриа илэрхийлж, тус улсад өрнөж буй үйл явц сайн явагдаж буй гэдэгт итгэлтэй байгаагаа онцолсон юм. Тэрбээр “Тэнд нөхцөл байдал тогтворжсон. Гайхамшигтай ерөнхийлөгч Делси Родригес болон түүний хүрээнийхэн бидэнтэй хамтран маш сайн ажиллаж байна” хэмээн хэлжээ.
Түүнчлэн Трамп “Бид Венесуэлээс олон зуун сая баррель газрын тос авч, Хьюстон болон бусад бүс нутаг руу боловсруулахаар илгээж байна. Венесуэлчүүдийн олон жилийн хугацаанд олсон мөнгөнөөс ч илүү их орлогыг бид тэдэнд өгч байна” хэмээн нэмж дурдсан байна.
Харин эх сурвалжуудын мэдээллээс эш татан The Atlantic сэтгүүлд мэдээлснээр, АНУ-ын удирдлагын хүрээнд Кубын эсрэг цэргийн ажиллагаа явуулах боломжийг судалж байгаа аж. Учир нь, Вашингтон Венесуэл болон Ираны эсрэг хэрэгжүүлсэн бодлого, ажиллагаанууд хүссэн үр дүнд хүрсэн гэж үзэж байгаа бололтой.
Эх сурвалж: TASS
