АНУ-ын Ерөнхийлөгч Дональд Трамп 2026 оны 3 дугаар сарын 3-ны мягмар гарагт Ираны эрх баригчдын удирдлагатай хэлэлцээр хийх боломжгүйг илэрхийлэв. Тэрбээр Truth Social сүлжээндээ “Тэдэнд одоо агаарын эсрэг хамгаалалт, нисэх хүчин, далайн цэрэг, удирдлага байхгүй. Тэд хэлэлцээр хийхийг хүсч байна. Би хэлсэн: ‘Оройтсон!’” гэж бичсэн байна.
Трампын гуравдугаар сарын 1-нд мэдэгдсэнээр, Ираны дээд удирдагч аятолла Али Хаменей нас барснаас хойш шинэ удирдлага түүнийг хэлэлцээрт урьсан бөгөөд тэр зөвшөөрчээ. АНУ-ын Ерөнхийлөгч The Atlantic сэтгүүлд өгсөн ярилцлагадаа “Тэд үүнийг өмнө нь хийх ёстой байсан. Маш удаан хүлээсэн” гэж хэлсэн байна.
Ираны Үндэсний аюулгүй байдлын дээд зөвлөлийн нарийн бичгийн дарга Али Лариджани гуравдугаар сарын 2-нд X сүлжээнд: “Бид АНУ-тай хэлэлцээр хийхгүй” гэж мэдэгджээ. Өмнөх өдөр нь The Wall Street Journal сонин Лариджани хэлэлцээрийн санаачилга гарган, Вашингтонд дамжуулсан гэж мэдээлсэн байна.
АНУ Ойрхи Дорнод дахь дипломат ажилтнуудаа нүүлгэнэ
АНУ-ын Гадаад хэргийн яам гуравдугаар сарын 3-нд Бахрейн, Иордан, Ирак, Катар, Кувейт, Арабын Нэгдсэн Эмират дахь Элчин сайдын яамны яаралтай шаардлагагүй ажилтнууд болон тэдний гэр бүлийг нүүлгэн шилжүүлэхээ зарлав.
Иракийн хувьд нүүлгэн шилжүүлж буй шалтгааныг “аюулгүй байдлын үүднээс” гэж тайлбарласан бол бусад таван улсад Ираны дрон, пуужингийн довтолгооны байнгын аюул байгаа гэж Вашингтонд тайлбарласан байна.
Саудын Араб болон Кувейт дахь АНУ-ын Элчин сайдын яам руу 2-3 дугаар сарын хооронд дроны халдлага болсон бөгөөд Кувейтийн Элчин сайдын яамыг “дараагийн мэдэгдэл гарах хүртэл” хаасан гэж AFP агентлаг мэдээлэв.
Израиль, АНУ-ын Иранд хийж буй цэргийн ажиллагаа
Израиль ба АНУ 2026 оны хоёрдугаар сарын 28-нд Ираны нутаг дэвсгэрт цохилт өгч эхэлсэн. Ерөнхийлөгч Трамп Ираны цөмийн хөтөлбөрийг устгах зорилготойгоо мэдэгдэж, Ираны армид зэвсгээ хаяхыг, иргэдэд “өөрсдийн хувь заяаг өөрсдөө шийдэх”-ийг уриалсан байна.
Ираны албан ёсны мэдээллээр гуравдугаар сарын 3-ны байдлаар 787 хүн амь үрэгдсэн бөгөөд үүнд аятолла Хаменей болон хэд хэдэн өндөр албан тушаалтан багтжээ. Иран хариуд нь Израиль болон Персийн булангийн хэд хэдэн улс руу цохилт өгч, тэнд ч хохирол гарсан байна. Тегераны үзэж буйр, тэд араб орнуудад бус, бүс нутгийн АНУ-ын цэргийн баазуудад цохилт өгч байгаа аж.
Дайны нөлөө
Израиль, АНУ-ын Ираны эсрэг ажиллагаа дунд болон урт хугацааны түвшинд нефть, байгалийн хийн үнэ өсөхөд, Ойрхи Дорнод дахь агаарын тээврийн системд саад учруулж эхэлжээ.
Агаарын тээвэр доголдсоны улмаас арван мянга орчим жуулчин бүс нутагт гацсан байна. Герман улсын иргэдийг дайны бүсээс нүүлгэн гаргах ажил гуравдугаар сарын 3-нд эхэлжээ.
Эх сурвалж: DW
