АНУ-ын цэргийн мэдэгдсэнээр, Кувейтийн агаарын хамгаалалтын хүчнүүд АНУ-ын гурван сөнөөгч онгоцыг санамсаргүйгээр буудаж унагасан байна. Энэ явдал нь Вашингтон Израилийн армитай хамтран Ираны эсрэг цэргийн ажиллагаа явуулж буй үеэр тохиожээ.
Цахим орчинд даваа гарагт тархсан бичлэгүүдээс АНУ-ын F-15E Strike Eagle сөнөөгч онгоцны нэгийнх нь сүүл хэсэг шатаж, утаа савсуулан эргэлдсээр доош унаж буй нь харагдсан байна. Өөр нэг бичлэгт хоёр нисгэгчийг шүхрээр буумагц нутгийн иргэд тусалж буйг харуулжээ.
АНУ-ын Төв командлал буюу US Central Command (CENTCOM)-ын мэдээлснээр, байлдааны идэвхтэй ажиллагааны үеэр Кувейтийн агаарын хамгаалалтын системүүд АНУ-ын гурван F-15E Strike Eagle онгоцыг андуурч буудсан аж.
CENTCOM-ын X сүлжээнд нийтэлсэн мэдэгдэлд “Нисэх багийн зургаан гишүүн шүхрээр амжилттай бууж, бүгд эсэн мэнд олдсон, биеийн байдал нь тогтвортой байна. Кувейт улс уг явдлыг хүлээн зөвшөөрсөн бөгөөд энэхүү ажиллагаанд дэмжлэг үзүүлсэн Кувейтийн батлан хамгаалах хүчнүүдэд талархал илэрхийлье” гэжээ.
Мөн “ослын шалтгааныг шалгаж буй бөгөөд нэмэлт мэдээллийг тодорхой болмогц нийтэлнэ” хэмээн нэмж дурдсан байна.
Кувейтийн Батлан хамгаалах яам АНУ-ын хэд хэдэн онгоц сүйрсэн болохыг баталж, шалтгааныг мөрдөн шалгаж байгаа талаар мэдэгджээ. Яамны төлөөлөгчийн хэлснээр, бүх нисгэгч эсэн мэнд, эмнэлэгт хүргэгдсэн бөгөөд биеийн байдал нь тогтвортой байгаа аж. Тус яам АНУ-ын цэргийн хүчнүүдтэй нягт хамтран ажиллаж буйгаа онцолжээ.
Кувейтийн зарим хэсэгт даваа гаргийн өглөө чанга дэлбэрэх чимээ, дохиолол сонсогдсон байна. Reuters агентлагийн иш татсан гэрчийн мэдээлснээр, Кувейт хот дахь АНУ-ын Элчин сайдын яамны ойролцоо утаа савсаж байсан аж. Аврах багууд ослын газар ажиллаж буй бичлэгүүд ч мөн нийтлэгдсэн байна.
Кувейтийн эрх баригчдын мэдээлснээр, нисгэгчгүй онгоцууд (дрон) нийслэл рүү ойртож, агаарын хамгаалалтын системүүд тэдгээрийн ихэнхийг Румайтия болон Салва дүүргүүдийн ойролцоо устгасан гэж улсын мэдлийн Кувейтийн Мэдээний агентлаг мэдээлжээ.
Үүний зэрэгцээ Иран Персийн булангийн хотуудын иргэний болон худалдааны бүсүүдэд цохилт өгсөөр буй нь бүс нутгийн нисэх, эдийн засгийн гол төвүүдэд мөргөлдөөний нөлөөг улам тэлж байгаа аж. Тегеран “АНУ, Израилийн гурван өдөр цохилт өгч дуусмагц бүс нутаг дахь АНУ-ын цэргийн объектуудыг онилно” гэж мэдэгджээ.
АНУ-ын зэвсэгт хүчний дээд командлагчдын нэг Пентагоноос “АНУ-ын цэргийн зорилтуудыг биелүүлэхэд цаг хугацаа шаардагдана” гэж мэдэгдсэн байна.
АНУ-ын Зэвсэгт хүчний штабын дарга Dan Caine сэтгүүлчдэд “Энэ бол нэг шөнийн дотор дуусах ажиллагаа биш. CENTCOM болон хамтарсан хүчний өмнө тавигдсан зорилтуудыг хэрэгжүүлэхэд тодорхой хугацаа шаардагдах бөгөөд зарим нь тун хүнд, төвөгтэй байх болно” гэж хэлжээ.
Тэрбээр мөн АНУ Ойрхи Дорнод руу нэмэлт цэрэг илгээсээр байгааг, хэдийнэ их хэмжээний цэргийн төвлөрөл бий болсныг онцолсон байна.
Эдгээр мэдэгдэл нь АНУ-ын Ерөнхийлөгч Доналд Трамп Ираны эсрэг довтолгоо дөрвөн долоо хоног үргэлжилж болзошгүй гэж хэлснээс хойш нэг хоногийн дараа гарчээ.
Мөн даваа гарагт Ираны эсрэг АНУ-ын цэргийн ажиллагааны үеэр дөрөв дэх америк цэргийн алба хаагч авсан шархаа даалгүй нас барсан байна.
Тухайн хэвлэлийн бага хурлын үеэр АНУ-ын Батлан хамгаалахын сайд Пит Хэгсэт Ираны эсрэг явуулж буй ажиллагаа “төгсгөлгүй дайн” болохгүй ч үтэр түргэн дуусахгүйг хүлээн зөвшөөрчээ. Түүний хэлснээр, ажиллагааны гол зорилго нь Тегераны пуужингийн хүчин чадал, тэнгисийн цэрэг болон аюулгүй байдлын дэд бүтцийг устгах явдал аж.
Хегсет “Энэ бол Ирак биш. Энэ бол төгсгөлгүй дайн биш” хэмээн онцолжээ.
Эх сурвалж: RIA NOVOSTI
