Израилийн Батлан хамгаалах хүчин гуравдугаар сарын 1-ний ням гарагт шилжих шөнө Ираны нутаг дэвсгэрт дахин цуврал цохилт өгсөн талаар Израилийн армийн олон нийтийн сүлжээнд нийтэлсэн мэдэгдэлд дурджээ.
Тус мэдэгдэлд “Ираны баллистик пуужингийн системүүд болон агаарын довтолгооноос хамгаалах байгууламжуудыг онилж довтолсон” гэж онцолсон байна.
Үүний зэрэгцээ Ираны төрийн хэвлэлүүд нийслэл Тегеранд дэлбэрэлт болсон талаар мэдээлжээ. AFP агентлагийн сэтгүүлчийн мэдээлснээр, хотод дор хаяж гурван удаагийн дэлбэрэлтийн чимээ сонсогдсон байна.
Ираны хэвлэлүүд: Али Хаменеи нас барсан
Гуравдугаар сарын 1-ний өглөө Ираны төрийн агентлагууд аятолла Али Хаменеи амиа алдсаныг баталсан байна. Fars агентлагийн мэдээлснээр, Хаменеиг өөрийн ордонд байрлах ажлын өрөөндөө байхад нь хөнөөсөн, тэрээр хоёрдугаар сарын 28-ны өглөө эрт нас барсан гэжээ.
Үүнтэй холбогдуулан Исламын хувьсгалын харуулын корпус “Исламын эх орны тусгаар тогтнолыг зөрчигчдийг шийтгэнэ” хэмээн мэдэгдсэн байна. Ираны Засгийн газар ч мөн Хаменей үхсэний дараа хариу мэдэгдэл гаргаж, “Энэ бол асар аймшигтай гэмт хэрэг бөгөөд зүгээр суухгүй. Энэ нь исламын ертөнц, шийт шашны түүхэнд шинэ хуудсыг нээх болно” хэмээн IRNA агентлагийн мэдээллээс иш татан уламжилжээ.
Израиль, АНУ-ын Ираны эсрэг цэргийн ажиллагаа
Израиль болон АНУ хоёрдугаар сарын 28-ны өглөө Тегеран болон Ираны бусад бүс нутагт цохилт өгсөн. АНУ-ын Ерөнхийлөгч Дональд Трамп Исламын Бүгд Найрамдах Ираны цөмийн хөтөлбөрийг устгах зорилготой байгаагаа мэдэгдэж, Ираны армийг зэвсгээ хураалгахыг, харин ард иргэдийг “өөрсдийн хувь заяаг гартаа атгах”-ыг уриалжээ.
Ираны Улаан Хавирган Сар Нийгэмлэгийн мэдээлснээр, цохилтын улмаас 201 хүн амиа алдаж, 747 хүн шархадсан байна. Өмнө нь Ираны эрх баригчид Минаб хот дахь охидын сургуулийн 108 сурагч амиа алдсан тухай мэдээлжээ.
The Guardian сонин тус хотод Исламын хувьсгалын харуулын корпусын бааз байрладаг хэмээн сануулсан аж. Израиль болон АНУ энэ мэдээлэлд тайлбар хийгээгүй байна.
Иран цохилтын хариуд Израилийн нутаг дэвсгэр болон Ойрхи Дорнод дахь АНУ-ын цэргийн баазуудад цохилт өгсөн. Израильд онц байдал зарласан бөгөөд Ираны хариу довтолгоо бүс нутгийн бусад улс орнуудыг ч хамарсан билээ.
Европын Холбоо Ойрхи Дорнодод өрнөж буй үйл явдлуудын улмаас гүнээ түгшиж байгаагаа илэрхийлэв. Герман, Франц, Их Британийн удирдагчид бүс нутгийн улс орнуудын эсрэг хийсэн Ираны довтолгоог эрс буруушааж, Тегераныг хэлэлцээний ширээнд суухыг уриалжээ.
Эх сурвалж: DW
