АНУ-ын Ерөнхийлөгч Дональд Трамп Ираны дээд удирдагч Аятолла Али Хаменеи нас барсан тухай мэдэгдэв. Тэрбээр хоёрдугаар сарын 28-ны бямба гарагт Truth Social нийгмийн сүлжээнд “Түүхэн дэх хамгийн харгис хүмүүсийн нэг Хаменеи нас барлаа.
Энэ бол зөвхөн Ираны ард түмэнд төдийгүй Хаменеи болон түүний цусанд дуртай дээрэмчдийн гарт амь үрэгдсэн, эсвэл тахир дутуу болсон Америкийн агуу иргэд болон олон орны хүмүүсийн хувьд шударга ёсны ялалт юм” хэмээн бичжээ.
Трампын хэлснээр, Хаменеи АНУ Израильтай нягт хамтран ашигласан “өндөр технологийн мөрдөн илрүүлэх систем”-ээс зугтаж чадаагүй аж.
Трамп: Энэ бол Ираны ард түмний хувьд түүхэн боломж
АНУ-ын Ерөнхийлөгч Хаменейгийн үхлийг “Ираны ард түмэн эх орноо эргүүлэн авах хамгийн агуу боломж” хэмээн нэрлэсэн байна. Мөн тэрбээр Ираны Хувьсгалын Харуулын Корпусын олон гишүүн, түүнчлэн бусад тусгай албаны цэргийнхэн “цаашид тулалдахыг хүсэхгүй, АНУ-аас дархан эрх хайж байна” гэж мэдэгджээ.
Трамп “Өчигдөр орой хэлсэнчлэн одоо тэд дархан эрх авч чадна, эс бөгөөс тэднийг үхэл л хүлээнэ!” хэмээн бичжээ.
Тэрбээр мөн Ираны Хувьсгалын Харуулын Корпус болон цагдаа нар “энх тайвнаар Ираны эх орончидтой нэгдэн, улс орноо жинхэнэ агуу байдалд хүргэхийн төлөө хамтран ажиллана” гэдэгт найдаж буйгаа илэрхийлсэн байна.
Нетаньяху Хаменейг нас барсан байж магадгүй гэж мэдэгдэв
Өмнө нь Израилийн Ерөнхий сайд Биньямин Нетаньяху Хаменеи амиа алдсан байж болзошгүй гэж мэдэгдсэн аж. Израилийн Channel 12 телевизийн мэдээлснээр, Хаменейн цогцосны зургийг Нетаньяху болон Трамп нарт үзүүлсэн байна.
Гэсэн хэдий ч Израилийн Батлан хамгаалах арми түүний үхсэнийг албан ёсоор батлаагүй бөгөөд амиа алдагсдын жагсаалтад Хаменейгийн нэр байгаагүй аж.
Израилийн Батлан хамгаалах армийн мэдэгдсэнээр, Израиль болон АНУ-ын цохилтын үр дүнд Ираны Хувьсгалын Харуулын Корпусын командлагч генерал Мохаммад Пакпур, Дээд удирдагчийн зөвлөх Али Шамхани, Батлан хамгаалахын сайд Азиз Насирзаде нар амь үрэгджээ.
Израиль, АНУ Ираны эсрэг цэргийн ажиллагаа явуулав
Израиль болон АНУ хоёрдугаар сарын 28-ны өглөө Тегеран болон Ираны бусад бүс нутагт цохилт өгсөн. Дональд Трамп Ираны цөмийн хөтөлбөрийг бүрэн устгах зорилготой байгаагаа мэдэгдэж, Ираны армид зэвсгээ хураалгахыг, харин ард иргэдэд “хувь заяагаа өөрсдийн гарт авах”-ыг уриалжээ.
Ираны Улаан Хагас Сар Нийгэмлэгийн мэдээлснээр, цохилтын улмаас 201 хүн амиа алдаж, 747 хүн шархадсан байна. Үүнээс өмнө Ираны эрх баригчид Минаб хот дахь охидын сургуулийн 108 сурагч амь үрэгдсэн гэж мэдээлжээ. The Guardian сонинд дурдсанаар, уг хотод Израилийн Батлан хамгаалах армийн цэргийн бааз байрладаг аж. Израиль болон АНУ энэ талаар тайлбар өгөөгүй байна.
Ираны хариу цохилт
Иран хариуд нь Израилийн нутаг дэвсгэр болон Ойрхи Дорнод дахь АНУ-ын цэргийн баазуудад цохилт өгч, Израильд онц байдал зарлажээ. Ираны хариу цохилт бүс нутгийн бусад улс орнуудыг ч хамарсан талаар мэдээлж буй юм.
Европын Холбооны байр суурь
Европын Холбоо Ойрхи Дорнод дахь нөхцөл байдлын талаар маш их санаа зовниж буйгаа илэрхийлэв. Герман, Франц, Их Британийн удирдагчид Ираны бүс нутгийн орнууд руу хийсэн дайралтыг эрс буруушааж, Тегераныг хэлэлцээний ширээнд суухыг уриалсан байна.
Эх сурвалж: DW
