Өнөөдөр 10.00 цагаас Монгол Ардын Намын Бага хурлын хоёрдугаар хуралдаан Тусгаар тогтнолын ордонд эхэлнэ. Албан ёсны мэдээллээр, тус намын 105 жилийн ойн зохион байгуулалтын асуудлыг хэлэлцэж, УИХ-ын дарга бөгөөд намын дарга Н.Учрал, Ерөнхий сайд Г.Занданшатар, Ерөнхий нарийн бичгийн дарга Я.Содбаатар нар илтгэл тавихаар төлөвлөжээ.
Гэвч энэ удаагийн Бага хурал бол зөвхөн ойн бэлтгэл ярьсан энгийн уулзалт биш аж. Сүүлийн саруудад өрнөсөн улс төрийн үйл явдлуудыг ажиглавал МАН дотор эрх мэдлийн дахин хуваарилалт, “гадна үлдсэн” улстөрчдийн эргэн ирэлт, шинэ намын даргын бодлогын шугам тодорч эхэлсэн нь илт.
Юуны өмнө авлига, нүүрсний болон бусад дуулиант хэргээр шалгагдаж байсан зарим улстөрчид дахин идэвхжиж эхэлсэн нь анхаарал татаж буй юм.
УИХ-ын гишүүн асан Ш.Раднаасэд, Ж.Сандагсүрэн, Ж.Мөнхбат зэрэг хүмүүсийн нэрс дахин улс төрийн төвшинд яригдаж, зарим нь албан тушаал, зарим нь намын гишүүнчлэлээ сэргээсэн нь санамсаргүй давхцал биш биз ээ.
Эдгээр хүмүүс бол өмнөх Засгийн газрын үед, тэр дундаа Л.Оюун-Эрдэнэ Ерөнхий сайд, Х.Нямбаатар Хууль зүйн сайд байх үед шалгагдаж, улс төрөөс шахагдсан бүлэг. Харин өнөөдөр тэд дахин “амь орж”, намын дотоод орон зайд эргэн нэвтэрч байна.
Энэ өөрчлөлтийн гол зангилаа нь Н.Учрал намын дарга болсонтой шууд холбоотой. Тэрбээр намын “уламжлалт тогтолцоог сэргээнэ”, анхан шатнаас явж ирсэн, намдаа үнэнч хүмүүсийг бодно хэмээн ил тод мэдэгдсэн. Энэ мессэж нь өмнө нь гадна үлдсэн улстөрчдөд бодит дохио болж, улмаар тэднийг дэмжигч “ах нар”-ын хөдөлгөөнийг ч идэвхжүүлжээ.
Эндээс харахад, Н.Учралын стратеги тодорхой. Нэг талаас Л.Оюун-Эрдэнийн үед бий болсон нөлөө бүхий баг, тэр дундаа Д.Амарбаясгалангийн улс төрийн жинг саармагжуулах, нөгөө талаас намын хууччуулыг дахин нэгтгэж, өөрийн даргын суудлыг бататгах зорилготой алхмууд шат дараатай хэрэгжиж байна гэж ажиглагчид үзэж буй юм.
Энэ хүрээнд нийслэлийн намын байгууллага, Х.Нямбаатарын байр суурь ч Бага хурлын үеэр яригдаж болзошгүй гэх хүлээлт улс төрийн хүрээнд бий аж. Хэрэв нийслэлийн намын хороог хуралдуулах шийдвэр гарвал энэ нь зөвхөн зохион байгуулалтын асуудал бус, харин нам доторх бодит эрх мэдлийн шинэ тэнцвэр тогтох дохио болох нь.
Өнөөгийн МАН дотор өрнөж буй үйл явцыг нэг өгүүлбэрээр тодорхойлбол: хуучин гомдол, шинэ амбиц, намын даргын төвлөрсөн эрх мэдэл гэсэн гурвалжин дээр улс төрийн шинэ тоглолт эхэлжээ.
