Австралийн Ерөнхий сайд Энтони Албанизи хүүхдийн бэлгийн хүчирхийллийн хохирогч, нийгмийн идэвхтэн Грейс Тэймийг “хэцүү хүн” гэж тодорхойлсныхоо дараа уучлал хүсжээ. Тэрбээр тус үгийг хэлэхдээ Тэймийн амьдралдаа туулсан бэрхшээлийг л хэлсэн гэж тайлбарласан байна.
Нэг үгээр хариулдаг асуулт-хариултын үеэр Албанизи 2021 оны “Оны Австрали хүн”-ээр нэрлэгдсэн Тэймийг “difficult” (хэцүү) гэж тодорхойлсон юм.
Өдгөө 31 настай Тэйм үүнд хариулахдаа “‘Хэцүү’ гэдэг бол захирагддаггүй эмэгтэй хүнийг тодорхойлох мисогинист (эмэгтэйчүүдийг дорд үзсэн) код үг. Түүх түүнийг ‘зоригтой’ гэж нэрлэх байх” гэжээ.
Үүний дараа Албанизи “Буруу ойлголт төрсөн бол уучлаарай” хэмээн хэлж, “Тэйм маш хүнд амьдрал туулсан ч түүнийгээ бусдад тустай зүйл болгож чадсан гавьяатай хүн” гэж мэдэгдсэн байна. Гэвч хэдхэн цагийн дараа Тэйм түүний уучлалыг хүлээж аваагүйгээ илэрхийлж, Instagram дээрээ “Намайг энэрч байгаа мэт бүү ханд. Бид бүгд таны хэлэх гэсэн үгийн утгыг мэдэж байна” гэж бичжээ.
Ногоон намын удирдагч Ларисса Уотерс мөн “Тэймийг ‘хэцүү’ гэж нэрлэх нь огт үндэслэлгүй” гэж шүүмжилсэн байна. Тэрбээр “Эмэгтэйчүүдийг ‘хэцүү’ гэж хочлосноор биднийг дуугүй болгож чадахгүй. Дараа нь ‘тэсвэртэй’, ‘дайчин’, эсвэл ‘шантрашгүй’ гэж хэлж үзээрэй, Ерөнхий сайд аа” гэжээ.
Бусад хариултууд
Албанизи мөн
- Donald Trump-ийг “ерөнхийлөгч”,
- сөрөг хүчний шинэ тэргүүн Ангус Тэйлорыг “удирдагч”,
- Цагаачлалын эсрэг One Nation намын дарга Полин Хэнсоныг “хагаралдуулагч” гэж нэрлэжээ.
Мөн Эндрю Маунтбаттен-Виндзорын талаар асуухад “балиар этгээд” гэсэн утгатай үг хэлсэн бөгөөд танхимд суугаа хүмүүс алга ташжээ.
Грейс Тэймийн түүх
Грейс Тэйм нь Тасмани мужид бэлгийн хүчирхийллийн хохирогчид өөрсдийн түүхийг олон нийтэд ярихыг хориглодог байсан хуулийг өөрчлүүлэхийн төлөө тууштай тэмцсэнээрээ 2021 онд “Оны Австрали хүн” болсон юм.
Тэр 15 настайдаа 58 настай математикийн багш Николаас Окер Бестерт хууртагдан, хүчирхийлэлд өртсөн байна. Бестер 2011 онд Тэймийг сурагч байх үед хүчирхийлсэн хэрэгт буруутгагдаж, 1 жил 9 сарын хорих ял эдэлжээ.
2022 онд Тэйм тухайн үеийн Ерөнхий сайд Скотт Моррисонтой албан ёсны арга хэмжээн дээр хамт зогсохдоо инээмсэглэхээс татгалзсан бичлэг, зургууд цахимд тарж байсан аж.
Тэр Моррисоны засгийн газар парламент дахь бэлгийн хүчирхийллийн асуудлаар хангалттай хариу арга хэмжээ аваагүй гэж шүүмжилж байжээ. Тухайлбал, улс төрийн ажилтан Бриттани Хиггинс 2019 онд даргынхаа өрөөнд хүчирхийлүүлсэн гэж мэдэгдсэн хэрэг олны анхаарал татаж байв.
“Globalise the intifada” маргаан
Саяхан Тэйм Палестиныг дэмжсэн жагсаал дээр үг хэлэхдээ “globalise the intifada” (дэлхий даяар бослого өрнүүлье) гэсэн хэллэг хэрэглэснээс болж дахин шүүмжлэлд өртсөн.
Энэхүү хэллэгийг саяхны “Бонди Бич”-д болсон буудалцааны дараа “үзэн ядалт өдөөсөн” уриа лоозонгуудыг хориглох шинэ хуулийн хүрээнд хориглох эсэхийг хэлэлцэж байгаа аж.
“Интифада” гэдэг нэр томъёо нь 1987 онд палестинчууд Израилийн Баруун эрэг болон Газын зурвасыг эзлэн түрэмгийлсний эсрэг бослого өрнүүлэх үед өргөн хэрэглэгдэж эхэлсэн үг аж.
Зарим хүмүүс үүнийг еврей хүмүүсийн эсрэг хүчирхийлэлд уриалсан утгатай гэж үздэг бол нөгөө хэсэг нь “Израилийн эзлэн түрэмгийлэл болон Газ дахь үйл ажиллагааны эсрэг энхийн эсэргүүцэл гэсэн утгатай” гэж тайлбарладаг.
Зарим улс төрчид, тухайлбал хуучин дэд ерөнхий сайд Барнаби Жойс Тэймийг энэ хэллэгийг хэрэглэсэн тул “Оны Австрали хүн” цолыг нь хураах ёстой гэж хүртэл шаарджээ.
Эх сурвалж: BBC
