Монгол Улс, БНСУ-ын ГХЯ хоорондын Консулын XII зөвлөлдөх уулзалт Сөүл хотноо энэ оны хоёрдугаар сарын 23-ны өдөр болов. Консулын зөвлөлдөх уулзалтад монголын талыг Гадаад харилцааны яамны Консулын газрын захирал Б.Болд, солонгосын талыг БНСУ-ын Гадаад хэргийн яамны Консул, Аюулгүй байдлын газрын захирал Юн Жү Сөг нар тэргүүлж оролцжээ.
Энэ удаагийн зөвлөлдөх уулзалтаар харилцан адил байх зарчмын хүрээнд иргэдийн виз мэдүүлэх болон зорчих нөхцөлийг хөнгөвчлөх чиглэлээр тодорхой арга хэмжээ авах, солонгосын визийг цахим хэлбэрт шилжүүлэх, хүчин төгөлдөр визтэй иргэдийг тус улсын хилийн шалган нэвтрүүлэх албаны ажилтнууд саатуулах, албадан буцааж байгааг шийдвэрлэх зэрэг асуудлыг хөндөж ярилцсан байна.
Солонгосын тал ЭСЯ-ны виз мэдүүлгийн үйл ажиллагааг цахим хэлбэрт шилжүүлэх, паспортын лавлагааг үндэслэн виз олгох боломжийг дотоодын журам, дүрэмд нийцүүлэн өөрчлөх боломжийг судлах, холбогдох дотоодын байгууллагуудтай зөвшилцөхөөр болжээ.
Түүнчлэн ойрын хугацаанд таваас дээш бүлэг жуулчдад визийн хөнгөлөлт үзүүлэх, уг зохицуулалт амжилттай хэрэгжих тохиолдолд цаашдын шат дараалсан арга хэмжээтэй уялдахыг тэмдэглэжээ.
Тус улсад монгол иргэдийн хууль бусаар оршин суугаа тоо буурч буй хэдий ч бусад орны дундаж 12 хувьтай харьцуулахад 2 дахин их буюу 24 хувьтай, Тайланд, Хятад, Вьетнам Улсын дараагаар дөрөвдүгээрт бичигдэж буй аж.
Ялангуяа, эдгээрийн 68 хувийг аялал жуулчлалын визтэй иргэд эзэлж буй агаад визийн хууль бус зуучлал, брокерын үйл ажиллагаа болон хуурамч материал бүрдүүлж байгаад анхаарах, хариуцлагатай аялах, хоёр улсын холбогдох хууль, журмыг иргэдэд сурталчлах, тэдэнд мэдээлэл түгээх чухал болохыг онцолжээ.
