Засгийн газрын ээлжит хуралдаан Төрийн ордонд болж байна. Гүйцэтгэх засаглал энэ өдрийн хуралдаанаараа Газрын тухай хуульд нэмэлт, өөрчлөлт оруулах тухай хуулийн төсөл, Олон улсад авто замаар ачаа тээвэрлэх тухай Монгол Улсын Засгийн газар, Бүгд Найрамдах Итали Улсын Засгийн газар хоорондын хэлэлцээрийг батлах тухай хэлэлцэхээр төлөвлөжээ.
Мөн хэлэлцэх асуудлын жагсаалтад “Зэсийн баяжмал хайлуулах, боловсруулах үйлдвэр байгуулах төслийг хэрэгжүүлэх зарим арга хэмжээний тухай” Засгийн газрын тогтоолын төсөл, “Эрдэнэс Тавантолгой” ХК-ийн хувьцааны талаар авах зарим арга хэмжээний тухай” Засгийн газрын тогтоолын төсөл багтсан байна.
Мөн НҮБ-ын Эрүүдэн шүүхийн эсрэг хорооноос Монгол Улсад өгсөн зөвлөмжүүдийг 2026-2028 онд хэрэгжүүлэх арга хэмжээний ерөнхий төлөвлөгөө батлах тухай, “Гашуунсухайт-Ганцмод боомтын хил дамнасан төмөр замын бүтээн байгуулалтын хаалттай бүс байгуулах тухай” Засгийн газрын 2025 оны 157 дугаар тогтоолд нэмэлт, өөрчлөлт оруулах тухай хэлэлцэхээр төлөвлөжээ.
Үүний зэрэгцээ Хилийн зарим боомтод тээвэр зохион байгуулалтыг сайжруулах талаар авах зарим арга хэмжээний тухай, Усан доорх соёлын өвийг хамгаалах тухай ЮНЕСКО-ийн конвенцыг соёрхон батлах тухай зэрэг асуудлыг хэлэлцэх юм байна.
