Улсын Их Хурлын ажлын хэсэг “Зөвшөөрлийн тухай хуульд нэмэлт, өөрчлөлт оруулах” болон холбогдох бусад хуулийн төслүүдийг хэлэлцүүлэгт бэлтгэх үүрэг бүхийгээр цуврал хэлэлцүүлэг зохион байгуулж эхэлсэн бөгөөд өнөөдрийн хэлэлцүүлэг 2026 оны 2 дугаар сарын 24-нд байгаль орчин, барилга, хот байгуулалт, зам, тээвэр, уул уурхай, эрчим хүчний салбарын хүрээнд болж, УИХ-ын гишүүн, ажлын хэсгийн ахлагч Д.Энхтүвшин нээж үг хэлэв.
Хэлэлцүүлгийн гол зорилго нь иргэн, аж ахуйн нэгжид учирч буй хүндрэл, дарамтыг бууруулах, бизнес эрхлэгчдэд таатай эрх зүйн орчин бүрдүүлэх, төрөөс олгодог зөвшөөрлийн тоо, олгох, сунгах процессыг хялбаршуулж цахимжуулснаар авлига, хүнд суртлыг бууруулахад чиглэсэн юм.
УИХ-ын гишүүд Х.Ганхуяг, Н.Учрал, Б.Заяабал нар 2025 оны 12 дугаар сарын 17-нд Зөвшөөрлийн тухай хуулийн нэмэлт, өөрчлөлт болон холбогдох 89 төслийг өргөн мэдүүлсэн бөгөөд Улсын Их Хурал хэлэлцэхийг дэмжсэн. Улсын Их Хурлын даргын 2026 оны 01 дүгээр сарын 22 дугаар захирамжаар ажлын хэсгийг Д.Энхтүвшинээр ахлуулан 21 гишүүний бүрэлдэхүүнтэйгээр байгуулсан бөгөөд цуврал хэлэлцүүлгийг энэ хүрээнд зохион байгуулж байна.
Өнөөдрийн хэлэлцүүлэгт салбарын яамдын төлөөлөл, тухайлбал байгаль орчин, уур амьсгалын өөрчлөлтийн яам, Хот байгуулалт, барилга, орон сууцжуулалтын яам, Зам, тээврийн яам, Аж үйлдвэр, эрдэс баялгийн яам, Эрчим хүчний яам оролцож, салбар тус бүрт Зөвшөөрлийн тухай хуулийн хэрэгжилт, цахимжуулалт болон тусгай зөвшөөрөл олголтын нөхцөл байдлыг танилцуулсан аж.
Байгаль орчин, уур амьсгалын салбарын хувьд 31 тусгай зөвшөөрлийг e-business.mn, license.mn системээр цахимаар олгож байгаа бөгөөд зарим шат дамжлага нь цаасан дээр үлдсэн ч үе шаттай цахимжуулж, албан хаагчийн оролцоог багасгаж, үйлчилгээний хугацааг багасгах ажил хийгдэж байна.
Барилга, хот байгуулалтын салбарт нийт 7005 тусгай зөвшөөрөлтэй аж ахуйн нэгж үйл ажиллагаа явуулж байгаа бөгөөд зураг төслийн чиглэлээр 1041, барилга угсралтын чиглэлээр 5188, өргөх байгууламжийн чиглэлээр 187, барилгын материалын үйлдвэрлэлийн чиглэлээр 337, хотын ус хангамж, ашиглалт үйлчилгээнд 225, баримт бичиг боловсруулж байгаа 27 тусгай зөвшөөрөлтэй компани үйл ажиллагаа явуулж байна.
Тус салбарт зөвшөөрлийн процессыг 2019 оноос үе шаттай цахимжуулж, 2025 оны 8 дугаар сард license.mn системд бүрэн шилжүүлснээр зөвшөөрөл авах хугацааг 21 хоногоос нэг хоногт багасгаж, хялбаршуулжээ.
Зам, тээврийн салбарт авто тээвэр, авто зам, усан зам, төмөр замын дөрвөн чиглэлээр тусгай зөвшөөрөл олгодог бөгөөд нийтдээ 3885 зөвшөөрөл олгож, авто замын тусгай зөвшөөрөл нийт зөвшөөрлийн 80%-ийг эзэлж байна. Тус салбарын бүх тусгай зөвшөөрлийг license.mn системд нэгтгэж, ирэх 3 дугаар сарын 1-ээс цахимаар үйлчилгээ үзүүлж эхлэхээр төлөвлөжээ.
Аж үйлдвэр, эрдэс баялгийн салбарт үйлдвэр технологийн паркийн тусгай зөвшөөрлийг цахимаар олгож, Засгийн газрын тогтоолоор батлуулдаг бөгөөд төмөрлөг боловсруулах, машин үйлдвэрлэх тусгай зөвшөөрлийг 10 хоногт, сунгах хүсэлтийг 5 хоногт шийдвэрлэдэг байна.
Мөн үйлдвэрлэлийн зориулалттай тэсрэх бодис, тэсэлгээний хэрэгсэл импортлох, үйлдвэрлэх, худалдах 120 тусгай зөвшөөрөлтэй 98 аж ахуйн нэгж үйл ажиллагаа явуулж байгаа юм. Эрчим хүчний салбарын хувьд 22 ангиллын тусгай зөвшөөрлийг цахимаар олгож байгаа бөгөөд 2025 онд нийтдээ 462 компани хүсэлт гаргаснаас 453-д нь зөвшөөрөл олгож, 9 компаний хүсэлтийг татгалзсан байна.
Төсөлд тусгагдсан гол үзэл баримтлал нь зөвшөөрлийн тоог бууруулах, эрх зүйн орчныг шинэчлэх, цахимжуулалтыг өргөжүүлэх, хяналт шалгалтыг сайжруулж, хүнд суртал, авлига бууруулахад чиглэж байгаа юм. Одоогийн 250 тусгай зөвшөөрлийг 205 болгож цөөлж, заримыг нь энгийн зөвшөөрөл болгохоор төлөвлөсөн бөгөөд “мэдэгдэл” хэмээх шинэ хэлбэрийг нэвтрүүлэхээр тусгасан байна.
Хэлэлцүүлэгт төрийн бус байгууллага, иргэд, бизнес эрхлэгчид, мэргэжлийн холбоод, судлаачид оролцож санал, шийдлээ хэлэлцсэн бөгөөд маргааш буюу 2026 оны 2 дугаар сарын 25-нд банк, санхүү, хөрөнгө оруулалт, харилцаа холбоо, мэдээллийн технологи, соёл боловсролын салбарын төлөөллүүдийн хэлэлцүүлгээр цуврал арга хэмжээ үргэлжилнэ.
