Найз нөхөдтэйгөө, согтууруулах ундааны зүйл хэрэглэсний дараа л хааяа нэг ширхэг тамхи татдаг, пабын гадна ганц нэг сорох нь бий, эсвэл “зөвхөн нарлахдаа татдаг” гэж тангарагладаг тэр нэг найз өөрийгөө “тамхичин” гэж үздэггүй нь мэдээж.
Гэвч тамхи цөөн татдаг байсан ч энэ нь биед тодорхой нөлөө үзүүлдэгийг мэргэжилтнүүд анхааруулж байна.
Их Британид тамхидалтын түвшин буурч байгаа тул олон хүн өөрийгөө “өдөр тутмын” тамхичдаас ангид гэж боддог болж байгаа аж.
Та “Бараг тамхи татдаггүй” гэж хэлчихээд, хааяа нэг асаагуур гаргадаг хүнтэй таарч л байсан байх. Гэвч ийм тодорхойлолт гэм хоргүй мэт сонсогдож болох ч эрүүл мэндийн салбарын мэргэжилтнүүд бага хэмжээний тамхидалт ч аюулгүй биш гэдгийг онцолжээ.
Эрэгтэй үргүйдлийг хэрхэн эмчлэх тухай ярьж буй эмч нарын хажуугаар, бас нэг эмч ганц ширхэг тамхи татахад биед яг юу болдгийг ил болгосон нь “зөвхөн нэг” гэсэн хандлагыг дахин бодоход хүргэж магадгүй юм.
Бие махбод тамхи байнга болон хааяа татдаг хүнийг ялгадаггүй
IQdoctor-ын эмнэлгийн зөвлөх, доктор Сюзанн Уайли саяхан Metro-д ярилцлага өгөхдөө “Бие махбод өдөр бүр тамхи татдаг хүн үү, хааяа татдаг хүн үү гэдгийг ялгадаггүй.
Тамхины утаанд өртөх бүрд никотин, нүүрстөрөгчийн дутуу исэл, давирхай болон олон төрлийн хорт бодис биед орж, шууд хуримтлагдах нөлөө үзүүлдэг” гэжээ.
Тэрбээр мөн “Судалгаагаар зүрх судасны тогтолцоо тамхины утаанд бараг тэр даруй хариу үйлдэл үзүүлдэг. Ганцхан ширхэг тамхи татсан ч гэсэн ялгаагүй” гэж тайлбарласан байна.
Доктор Уайли “Өдөрт 20 ширхэг татдаг хүн илүү өндөр эрсдэлтэй нь мэдээж. Гэхдээ бие махбодод үзүүлэх сөрөг нөлөө нь хамгийн анхны тамхинаас эхэлдэг” гэж онцолжээ.
Нэг ширхэг тамхины шууд нөлөө
Хэрэв хүн ганц ширхэг тамхи татвал биед дараах шууд, түр зуурын өөрчлөлтүүд илэрдэг байна. Үүнд: зүрхний цохилт, цусны даралт түр хугацаанд нэмэгдэх, судас агших, нүүрстөрөгчийн дутуу исэлд өртсөний улмаас хүчилтөрөгчийн дамжуулалт түр багасах зэрэг ордог аж.
Урт хугацааны эрсдэл ч бий
Доктор Уайли мөн урт хугацааны эрсдэлийн талаар дурдсан байна. Тэрбээр “Бага хэмжээгээр татах нь ч уушги, ам, хоолой, улаан хоолойн хорт хавдрын эрсдэлийг нэмэгдүүлдэг. Харин архитай хавсран хэрэглэвэл хавдар үүсгэх нөлөө улам нэмэгддэг” гэжээ.
Доктор “Эрүүл хүний хувьд эдгээр өөрчлөлт нь түр зуурынх байж болох бөгөөд бие махбод хэдэн цаг, эсвэл хоногийн дотор ихэнхдээ сэргэдэг. Нэг удаагийн тамхидалт нь байнгын, хэмжигдэхүйц гэмтэл учруулах магадлал маш бага” гэжээ.
Хамгийн том асуудал — зуршил
Доктор Уайлигийн үзэж буйгаар, хамгийн ноцтой асуудал нь зуршил бий болох эрсдэл юм.
Тэр “Аюулгүй доод хэмжээ гэж байдаггүй. Нэг удаагийн эрсдэл маш бага мэт санагдавч ганц соролт ч судасны дотор ханыг үрэвсүүлэх, эсийн түвшинд исэлдэлтийн стресс үүсгэдэг” хэмээн анхааруулсан байна.
Тэрбээр эцэст нь “Эрсдэл гэдэг нь хар, цагаанаар ялгарах ойлголт биш. Эмч бидний санааг хамгийн их зовоодог зүйл бол ганц удаагийн тамхи биш, харин зан үйлийн чиг хандлага юм.
‘Зөвхөн нэг’ гэсэн нөхцөл байдал давтагдсаар байвал аажмаар тогтмол, эсвэл хааяа татдаг хэв маягт шилждэг. Харин олон жилийн турш үргэлжилсэн тогтмол өртөлт л урт хугацаанд эрүүл мэндийг бодитоор өөрчилдөг” гэж дүгнэжээ.
Эх сурвалж: UNILAD
