Украины Ерөнхийлөгч Владимир Зеленский “Украин дахь дайныг зогсоох хэлэлцээний үеэр АНУ нь ОХУ-тай ижил байр суурь баримталж, Киевээс Донбассаасаа татгалзахыг шаардсан” гэж мэдэгджээ.
Тэрбээр хоёрдугаар сарын 20-ны баасан гарагт AFP агентлагт ярилцлага өгөхдөө “Америкчууд ч, оросууд ч ‘хэрвээ дайныг маргааш дуусгамаар байвал Донбассаас гар’ гэж хэлж байна” хэмээн онцолсон байна.
Гал зогсоох хэлэлцээнд газар нутгийн асуудал хамгийн том саад хэвээр байгаа билээ. Эдгээр хэлэлцээг Москва, Киев хоёр АНУ-ын зуучлалаар явуулж буй.
ОХУ бүх Донбассыг өөрийнх гэж үзэж байгаа ч бодит байдал дээр тус бүс нутгийн зөвхөн нэг хэсгийг л хяналтдаа оруулжээ.
Харин Украин энэ шаардлагыг эрс няцааж, фронтын шугамыг одоогийн байршлаар нь царцаах ёстой гэж үзэж буй аж.
Одоогийн байдлаар Украины Зэвсэгт Хүчин Донецк мужийн ойролцоогоор тавны нэгийг хянаж байгаа бол ОХУ-ын цэргүүд Луганск мужийн бараг бүх нутгийг эзэлжээ.
Европын цэргүүд Фронтын шугамын ойролцоо
Мөн уг ярилцлагын үеэр Зеленский гал зогсоосны дараа Европын цэргүүдийг фронтын шугамын ойролцоо байрлуулахыг дэмжиж буйгаа илэрхийлжээ.
Тэр “Украинчууд, мэдээж, манай түншүүд фронтын шугам дээр бидэнтэй хамт байгаасай гэж хүсэж байна” гэж хэлсэн ч “эхний шугам дээр хэн ч зогсохыг хүсэхгүй нь ойлгомжтой”-г хүлээн зөвшөөрсөн байна.
Гал зогсоох нөхцөлийг хангах зорилготой олон улсын контингент байгуулах санаачилгыг ялангуяа Франц, Их Британи идэвхтэй дэмжиж байгаа аж.
Францын Ерөнхийлөгч Эммануэль Макрон, Их Британийн Ерөнхий сайд Кир Стармер нар нэгдүгээр сарын эхээр Парист Зеленскийтэй уулзан, ийм контингент илгээх санаархлын тухай хамтарсан тунхаг бичигт гарын үсэг зуржээ.
Гэсэн хэдий ч Макрон цэргүүдийг газар, агаар, тэнгисийн орчинд, “холбоо барих шугамаас хол” байрлуулах ёстой гэж тодотгосон байна. Харин Зеленский эсрэгээрээ, контингентийг фронтын шугамд илүү ойр байлгахыг хүсэж буйгаа илэрхийлжээ.
Германы байр суурь
Германы канцлер Фридрих Мерц нэгдүгээр сарын эхээр Украинд зориулсан олон улсын гал зогсоох ажиллагаанд зориулсан цэргийн бүрэлдэхүүний нэг хэсэгт Бундесверийн цэргүүд оролцож магадгүй гэж мэдэгдсэн байна.
Түүний хэлснээр, Германы цэргүүдийг Украины нутаг дэвсгэр дээр бус, харин НАТО-гийн гишүүн хөрш улсад байрлуулах ёстой аж.
Мерц тухайн үед “Герман улс улс төр, санхүү болон цэргийн оролцоогоо үргэлжлүүлнэ. Энэ нь, жишээлбэл, гал зогсоосны дараа бид Украинд зориулсан хүчнийг НАТО-гийн хөрш улсын нутаг дэвсгэрт байрлуулж магадгүй гэсэн үг” хэмээн мэдэгдсэн байна.
Эх сурвалж: DW
