Хүний эрхийн байгууллага Amnesty International (AI) Оросын колонид нас барсан сөрөг хүчний улстөрч Алексей Навальныйн нас барсны хоёр жилийн ойг тохиолдуулан Герман улсыг Навальныйг дэмжигчид болон ОХУ-д улс төрийн хэлмэгдүүлэлтэд өртөж буй бусад иргэдэд олгох виз, оршин суух зөвшөөрлийн журмаа зөөлрүүлэхийг уриалжээ.
Amnesty International-ийн Германд дахь ерөнхий нарийн бичгийн дарга Юлия Духров “Хоёр жилийн өмнө Алексей Навальный Хойд туйлын цаадах алслагдсан засан хүмүүжүүлэх колонид нас барсан.
Өнөөг хүртэл Оросын эрх баригчид түүний үхлийн бодит нөхцөлийг нуун дарагдуулсаар байгаа атлаа түүнийг дэмжигчдийн эсрэг тасралтгүй хавчлага явуулж байна.
Энэхүү системтэй хэлмэгдүүлэлт нь Оросын төр энхийн шинжтэй аливаа шүүмжлэлийг хэрхэн хатуу, эвлэршгүйгээр хүлээн авдгийг тодорхой харуулж байна” хэмээн мэдэгдэлдээ онцолжээ. Уг мэдэгдэл хоёрдугаар сарын 16-ны даваа гарагт нийтлэгдэв.
Amnesty International-ээс мэдээлснээр, өнгөрсөн онд Навальныйн өмгөөлөгчид болон Авлигатай тэмцэх сангийн дөрвөн ажилтан олон жилийн хорих ял сонсжээ.
Нийтдээ Оросын эрх баригчид Авлигатай тэмцэх сангийн эсрэг 100 гаруй эрүүгийн хэрэг үүсгэсэн бөгөөд тэдгээрийн 79 нь зөвхөн сүүлийн нэг жилийн хугацаанд бүртгэгдсэн байна. Тус санг мөн “террорист байгууллага” хэмээн зарласан юм.
Amnesty International мэдэгдэлдээ “Энэ бол Засгийн газрыг хууль ёсоор шүүмжилж буй үйл ажиллагааг гэмт хэрэгт тооцож, бүр насан туршийн хорих ял хүртэл оноох зорилготой, улс төрийн сэдэлтэй шийдвэр” хэмээн дурджээ.
Германд хандан: Навальныйг дэмжигчдэд виз олголтыг зөөлрүүлэхийг уриалав
Amnesty International-ийн Германд дахь салбарын тэргүүн Оросын эрх баригчдад хандан “Алексей Навальныйтай холбоотой байсан, эсвэл түүний үйл ажиллагаанд оролцсон гэх үндэслэлээр ял шийтгүүлсэн бүх хүнийг нэн даруй, ямар ч болзолгүйгээр суллаж, шударга бус шүүхийн шийдвэрүүдийг хүчингүй болгох ёстой” хэмээн шаарджээ.
Үүний зэрэгцээ Юлия Духров “Орост ил тод байдал, хууль дээдлэх зарчим, хүний эрхийн төлөө тэмцсээр байгаа бүх хүнийг хамгаалах шаардлагатай” хэмээн онцолж, энэ хүрээнд Герман улсын Засгийн газарт хандан уриалга гаргасан байна.
Amnesty International “Навальныйг дэмжигчид болон Орост хавчлагад өртөж буй бусад хүмүүсийн виз олголт, оршин суух зохицуулалтад уян хатан хандахыг бид Холбооны Засгийн газраас шаардаж байна” гэж мэдэгдэлдээ дурджээ.
Европын таван улс: Навальный хордлогын улмаас нас барсан
Навальный “маш өндөр магадлалтайгаар” эпибатидин хэмээх, Эквадорын модонд авирдаг мэлхийн арьснаас гарган авдаг маш хорт бодисоор хордуулсны улмаас нас барсан гэсэн дүгнэлтийг Их Британи, Герман, Нидерланд, Франц, Шведийн засгийн газрууд гаргасан байна. Эдгээр улсын лабораториуд Навальныйн биологийн дээжээс уг хорыг илрүүлжээ.
Таван улсын Гадаад хэргийн яамдын хамтарсан мэдэгдлийг UK Foreign Office хоёрдугаар сарын 14-нд нийтэлсэн байна. Мэдэгдэлд дурдсанаар, уг төрлийн мэлхий нь Өмнөд Америкт амьдардаг, ОХУ-д байдаггүй бөгөөд лабораторийн нөхцөлд эпибатидин ялгаруулдаггүй аж.
Их Британийн ГХЯ-наас “Навальныйг Сибирийн засан хүмүүжүүлэх колонид хоригдож байх хугацаанд энэхүү үхлийн аюултай хорыг хэрэглэх боломж, сэдэл, нөөц нь зөвхөн Оросын төрд л байсан” хэмээн мэдэгдэж, түүний үхэлд Оросын төрийг буруутай гэж үзэж буйгаа илэрхийлжээ.
Юлия Навальная: Путиныг хариуцлага хүлээх өдөр ирнэ
Оросын сөрөг хүчний удирдагчийн бэлэвсэн эхнэр Юлия Навальная судалгааны дүнг тайлбарласан байна.
Тэрбээр “Би дахин хэлье. Владимир Путин миний нөхөр Алексей Навальныйг химийн зэвсэг ашиглан хөнөөсөн. Путин бол алуурчин гэдэг нь шинэ зүйл биш. Харин одоо бидэнд үүний бас нэг шууд нотолгоо байна.
Нэг л өдөр тэр шүүхийн өмнө зогсож, хийсэн бүхнийхээ төлөө хариуцлага хүлээнэ гэдэгт би итгэж байна” гэжээ.
Навальныйн хордлого ба үхэл
Алексей Навальный 2020 оны наймдугаар сард Томск-Москва чиглэлийн нислэгийн үеэр ухаан алдаж, онгоцыг Омск хотод яаралтай буулгасан бөгөөд тэнд анхны тусламж үзүүлжээ.
Дараа нь ухаан ороогүй хэвээр байсан түүнийг Берлиний Шарите клиник эмнэлэгт шилжүүлэн эмчилж, нөхөн сэргээх эмчилгээ хийсэн байна.
Германы Бундесверийн тусгай лабораторийн шинжилгээгээр Навальныйн биед “Новичок” бүлгийн мэдрэл саатуулагч хорт бодис илэрсэн бөгөөд ижил дүгнэлтийг Швед, Францын лабораториуд болон Химийн зэвсгийг хориглох байгууллага мөн гаргажээ.
Навальный 2021 оны нэгдүгээр сард Орос руу буцаж очоод баривчлагдан, ял шийтгүүлсэн.
Улмаар 2024 оны хоёрдугаар сарын 16-нд, Ямал-Ненецийн автономит тойргийн колонид хоригдож байхдаа тодорхойгүй нөхцөлд нас барсан байна.
The Insider болон Der Spiegel-ийн мэдээлснээр, түүний гэр бүлийнхэн Навальный нас барсны дараа биоматериалын дээжийг Оросоос гаргаж чаджээ.
Эх сурвалж: DW
