Германы иргэдийн бараг гуравны хоёр буюу 65 хувь нь ойрын жилүүдэд дэлхийн энх тайванд хамгийн их аюул заналхийлэл учруулах улс орноор АНУ-ыг нэрлэсэн байна.
Энэ нь Алленсбах дахь Нийгмийн санал бодол судлах хүрээлэн (Institut für Demoskopie Allensbach)-ээс Стратеги ба дээд удирдлагын төв (Centrum für Strategie und Höhere Führung)-ийн захиалгаар явуулсан судалгааны дүнгээр тогтоогджээ.
Уг судалгаанд нэгдүгээр сарын 6-наас 19-ний хооронд 16-гаас дээш насны 1077 иргэн хамрагдсан бөгөөд үр дүнгийн талаар хоёрдугаар сарын 10-ны мягмар гарагт DPA агентлаг мэдээлсэн байна.
Харьцуулбал, 2025 онд ижил асуултад ийнхүү хариулсан иргэдийн хувь 46 хувь, 2024 онд 24 хувь байсан нь АНУ-д итгэх итгэл сүүлийн жилүүдэд мэдэгдэхүйц буурчээ.
Мөн хамгийн сүүлийн судалгаагаар Германы иргэдийн ердөө 32 хувь нь НАТО-гийн гишүүн Европын аль нэг улсад халдлага гарсан тохиолдолд АНУ цэргийн тусламж үзүүлнэ гэж үзжээ. Харин 35 хувь нь үүнд итгэхгүй гэж хариулсан бол 33 хувь нь тодорхой байр суурь илэрхийлээгүй байна.
Үүний зэрэгцээ судалгаанд оролцогчдын 81 хувь нь ойрын жилүүдэд дэлхийн энх тайванд хамгийн том аюул заналхийлэл учруулах улс орноор Оросыг нэрлэжээ. Украины эсрэг бүрэн хэмжээний дайн эхэлснээс хойш жил бүр энэ үзүүлэлт 75-82 хувийн хооронд хэлбэлзэж ирсэн байна. Харин БНХАУ-ыг дэлхийн энх тайванд заналхийлж буй том гүрэн гэж үзсэн германчуудын хувь 46 байжээ.
Дайны үед германчуудын тэн хагас нь эх орноо орхихгүй
Судалгаанд хамрагдсан иргэдийн ихэнх нь Герман ойрын жилүүдэд дайнд татагдан орно гэдэгт итгэхгүй байгаа аж. Тодруулбал, 40 хувь нь ийм нөхцөл байдал үүсэхийг “магадлал багатай”, 5 хувь нь “маш бага магадлалтай” гэж үзсэн бол 24 хувь нь тодорхой хариулт өгөөгүй байна. Харин дайныг “маш өндөр магадлалтай” гэж үзсэн хүн ердөө 3 хувь, “нэлээд магадлалтай” гэж үзсэн нь 28 хувь байжээ.
Гэсэн хэдий ч дайны нөхцөл байдал үүссэн ч гэсэн 49 хувь нь Герман улсаа орхих талаар огт бодохгүйгээ илэрхийлсэн байна. Харин 24 хувь нь шаардлагатай тохиолдолд ийм боломжийг судалж үзнэ гэж хариулсан бол 14 хувь нь энэ талаар аль хэдийн бодож үзнэ гэдгээ хэлжээ. Үлдсэн 13 хувь нь тодорхой шийдэлд хүрээгүй байна.
Эх сурвалж: DW
