FIFA-гийн ерөнхийлөгч Жанни Инфантино ОХУ-ыг олон улсын тэмцээн уралдаанд оролцохыг хориглосон дөрвөн жилийн хориг ямар ч үр дүнд хүрээгүй хэмээн үзэж, уг хоригийг цуцлах хүсэлтэй байгаагаа илэрхийлэв.
ОХУ 2022 оны хоёрдугаар сард Украинд халдан довтолсноос хойш тус улсын клубүүд болон шигшээ багийг FIFA болон UEFA-гийн бүх тэмцээнээс хассан.
Инфантино Sky Sports-т өгсөн ярилцлагадаа “Энэ хориг ямар ч үр дүн авчраагүй. Харин ч илүү бухимдал, үзэн ядалт бий болгосон” хэмээн онцолжээ.
Тэр “Оросын охид, хөвгүүд Европын бусад орнуудад хөлбөмбөг тоглох боломжтой байх нь эерэг нөлөө үзүүлнэ” гэж нэмж хэлсэн байна.
Түүнчлэн Инфантино “Улс төрийн удирдагчдын үйлдлээс болж аль нэг улсыг хөлбөмбөг тоглох эрхгүйгээр хасах ёсгүй” хэмээн байр сууриа илэрхийлжээ.
Өдгөө 55 настай FIFA-гийн ерөнхийлөгч “Хэн нэгэн нь холбоо харилцааг нээлттэй хэвээр хадгалах ёстой” гэж нэмж хэлсэн байна.
Украины спортын сайд Матвий Бидный Инфантиногийн энэхүү мэдэгдлийг “хариуцлагагүй” бөгөөд “хүүхдэрхүү” хэмээн шүүмжилжээ.
Бидный Sky Sports-т “Эдгээр үг нь хүүхдүүд амь үрэгдэж буй бодит нөхцөл байдлаас хөлбөмбөгийг таслан салгаж байна” хэмээн ярьсан байна.
UEFA-гийн ерөнхийлөгч Александр Чеферин ОХУ-ыг олон улсын тэмцээнд дахин оролцуулахын тулд Украинд өрнөж буй дайн дуусах ёстой гэсэн байр сууриа хэвээр хадгалж байгаа аж.
Энэ нь өнгөрсөн оны дөрөвдүгээр сард болсон UEFA-гийн Конгрессын хаалтын хэвлэлийн бага хурлын үеэр хэлсэн үгтэй нь нийцэж байгаа аж.
Мөн Инфантино 2026 оны ДАШТ-ий сугалааны арга хэмжээний үеэр АНУ-ын Ерөнхийлөгч Дональд Трампад энх тайвны шагнал олгосон FIFA-гийн шийдвэрийг хамгаалсан тайлбар хийжээ.
Эх сурвалж: REUTERS
