Ираны нийслэл Тегеран хотод сүүлийн долоо хоногуудад өрнөсөн эсэргүүцлийн жагсаал болон Ираны үндэсний мөнгөн тэмдэгт риалын ханшийн огцом уналтын улмаас хүнсний бүтээгдэхүүний үнэ богино хугацаанд хоёр дахин өсчээ.
Орон нутгийн худалдаачид болон эх сурвалжуудын мэдээлснээр, үндэсний хоол хүнсний гол хэрэглээ болсон бүтээгдэхүүнүүд хамгийн ихээр өртөж, гурван сарын өмнө 8-9 сая риалаар худалдаалагдаж байсан нэг шуудай будаа өнөөдөр 24-30 сая риалд хүрсэн бол энэ оны эхээр нэг килограмм үхрийн мах 8 сая риал байсан бол одоо 15-30 сая риалаар зарагдаж байгаа аж.
Мөн өндөгний үнэ 2-3 дахин, ургамлын тосны үнэ 4 дахин өссөн нь иргэдийн өдөр тутмын амьдралд эдийн засгийн ноцтой дарамт үүсгэж буй юм байна.
Худалдаачид үнийн өсөлт цаашид ч үргэлжлэх төлөвтэй байгааг анхааруулж, Иранд ажлын шинэ долоо хоног эхлэх бямба гарагт дахин үнэ нэмэгдэх хүлээлттэй байгааг дурджээ.
Үүн дээр мусульман шашны ариун Рамадан сар ойртож, улмаар Ираны шинэ жилтэй давхацсанаар хүнсний бүтээгдэхүүний эрэлт нэмэгдэж, үнийн өсөлт дахин эрчимжих бодит эрсдэл үүссэн байна.
Эдгээр үйл явц нь өнгөрсөн оны арванхоёрдугаар сарын сүүлчээс эхэлсэн риалын ханшийн огцом уналтаас үүдэлтэй эсэргүүцлийн жагсаалтай шууд холбоотой бөгөөд валютын ханшийн уналт нь бөөний болон жижиглэнгийн зах зээлд хүчтэй нөлөөлж, үнийн огцом савлагаа бий болгожээ.
Нэгдүгээр сарын 8-наас жагсаал хөдөлгөөнүүд улс даяар өргөжин тэлж, 1979 онд түлхэн унагасан шахын хүү Реза Пехлевийн уриалгаар илүү идэвхжсэн байна.
АНУ-ын Ерөнхийлөгч Дональд Трамп Ираны эрх баригчдыг жагсагчдын эсрэг зэвсэг хэрэглэсэн тохиолдолд цэргийн цохилт өгөх боломжтой хэмээн анхааруулж байв.
Үүний улмаас нэгдүгээр сарын 22-ны шөнө Тегеран хотын агаарын орон зайг түр хугацаанд хаасан ч бодит цэргийн ажиллагаа явагдаагүй аж. Харин нэгдүгээр сарын 12-нд Ираны эрх баригчид нөхцөл байдлыг хяналтдаа авсанаа мэдэгдэж, хоёр хоногийн дараа эмх замбараагүй байдал зогссоныг албан ёсоор зарласан.
Орон нутгийн эх сурвалжуудын мэдээлснээр, эсэргүүцлийн үеэр 3000 гаруй хүн амь үрэгдэж, ноцтой хохирол учирсан байна.
Ираны тал АНУ-аас халдлага үйлдэх оролдлого гаргавал хатуу хариу арга хэмжээ авахаа мэдэгдэж, Ираны пуужингийн тусгал нь бүс нутгийн америк баазуудад хүрэх боломжтойг онцолж, бүс нутгийн аюулгүй байдал улам хурцадмал шинжтэй болоод байгаа билээ.
Эх сурвалж: RIA NOVOSTI
