Монгол Улсын Их Хурлын даргын энэ оны 28 дугаар захирамжаар байгуулагдсан эдийн засгийн эрх, эрх чөлөөг хангах, бизнесийн үйл ажиллагаа эрхлэх таатай орчныг бүрдүүлэх чиглэлээр холбогдох хууль, тогтоомжийн төсөл боловсруулах чиг үүрэг бүхий Ажлын хэсэг анхны хуралдаанаа хийв.
Засгийн газраас Эдийн засгийн эрх чөлөөний тухай хуулийн төслийг боловсруулж, Улсын Их Хуралд өнгөрөгч 2025 оны 12 дугаар сарын 18-нд өргөн мэдүүлсэн бол Улсын Их Хурал дахь Ардчилсан намын бүлэг мөн хуулийн төсөл боловсруулж буй. Энэ талаарх Ажлын хэсгийн гишүүдийн байр суурийг хүргэе.
“МАНАЙ УЛС МАЛ СҮРГЭЭ ТӨРИЙН ХАМГААЛАЛТАД АВСАН ХЭРНЭЭ ХҮНЭЭ ХЭРХЭН ХАМГААЛЖ БАЙГАА НЬ ЭРГЭЛЗЭЭТЭЙ БОЛСОН”
Улсын Их Хурлын гишүүн Л.Энх-Амгалан: -Манай улс Үндсэн хуулиараа мал сүргээ төрийн хамгаалалтад авсан хэрнээ хүнээ хэрхэн хамгаалж, иргэдийнхээ эрх, эрх чөлөөг ямар хэмжээнд хангаж байгаа маань ихээхэн эргэлзээтэй болсон.
Төрийн хүнд суртал, лиценз зөвшөөрлөөр хяхан боогдуулах, татвар, төлбөрөөр дарамт шахалт учруулах явдал хэрээс хэтэрсэн. Иймд Ажлын хэсэг эдийн засгийн эрх, эрх чөлөөг хангах хуулийн төсөлд төрийн оролцооны зааг хязгаарыг тогтоох, хүнд суртал, зөвшөөрлийг цөөлж багасгах, иргэдийн бизнес эрхлэхэд саад бэрхшээл болж буй хууль, журам дүрмийг цуцлах, шинээр батлахгүй байх зэрэг харилцааг нэн тэргүүнд тусгах ёстой.
Засгийн газраас Эдийн засгийн эрх чөлөөний тухай хуулийн төслийг боловсруулж, Улсын Их Хуралд өнгөрөгч 2025 оны 12 дугаар сарын 18-нд өргөн мэдүүлсэн бол Улсын Их Хурал дахь Ардчилсан намын бүлэг мөн хуулийн төсөл боловсруулж байна.
Эдгээр төслүүдийг нэгтгэж, Улсын Их Хуралд суудалтай нам, эвслийн бүлэг, зөвлөл болон салбарын бизнес эрхлэгчид, Монголын Үндэсний Худалдаа, аж үйлдвэрийн танхим (МҮХАҮТ) болон бусад мэргэжлийн холбоодын саналыг нэгтгэн, үндэсний зөвшилцлөөр энэ хуулийг батлах ёстой гэж үзэж байна.
“БИЗНЕС ЭРХЛЭГЧИД ААН-ҮҮДЭД УРЧУУЛЖ БУЙ ТАТВАРЫН ДАРАМТ ИХ БАЙХ ТУСАМ ТӨСӨВ ТОМОРЧ БАЙНА”
Улсын Их Хурлын гишүүн П.Ганзориг: -Бизнес эрхлэгчид, аж ахуйн нэгжид учруулж буй татварын дарамт их байх тусам төсөв томорч, тэр хэрээр эдийн засаг дахь төрийн оролцоо нэмэгдэж байна. Эдийн засгийн эрх чөлөөний асуудлыг халамжаас хөдөлмөрт зэрэг төрийн бодлого, төсвийн хэрэгжилттэй уялдуулах учиртай.
“ТӨСВИЙН САХИЛГА БАТ ЗЭРЭГ МАШ ОЛОН АСУУДЛЫГ УЯЛДУУЛАХ ШААРДЛАГАТАЙ”
Улсын Их Хурлын гишүүн Б.Мөнхсоёл : Энэ талаарх олон улсын индексээр манай улс хангалтгүй дүнтэй явж байна. Хуулийн төслүүдийг нэгтгэн боловсруулахад бизнес дэх төрийн оролцоо, хүнд суртал, дарамт шахалт зэргээс гадна төсвийн сахилга бат гэх мэт олон асуудлыг уялдуулах шаардлага бий.
“ЭМЭГТЭЙЧҮҮДИЙН ЭДИЙН ЗАСГИЙН ЭРХ ЧӨЛӨӨГ БАТАЛГААЖУУЛАХ АСУУДЛЫГ
ХУУЛИЙН ТӨСӨЛД ТОДОРХОЙ ТУСГАХ НЬ ЗҮЙТЭЙ”
Улсын Их Хурлын гишүүн А.Ундраа: -Өмчийн харилцаанд хувийн өмч эрх зүйн давамгай нөхцөлтэй байх ёстой гэсэн Үндэсний эвслийн байр суурь бий. Төр, хувийн хэвшлийн түншлэлийн харилцаанд гэхэд төр давамгайлсан бус, хувийн хэвшил давамгайлсан зохицуулалттай байх ёстой. Эмэгтэйчүүдийн эдийн засгийн эрх чөлөөг баталгаажуулах асуудлыг хуулийн төсөлд тодорхой тусгах нь зүйтэй.
