ОХУ-ын зэвсэгт хүчин нисгэгчгүй хүчирхэг бөмбөгдөгч төхөөрөмж (БПЛА)-өөр нэгдүгээр сарын 28-ны өдөр Одесс болон Киев хотод цохилт өгсөн байна.
Киев мужийн Белгород суманд олон давхар орон сууц руу цохилт өгснөөр хоёр хүн амь үрэгдсэн талаар мужийн цэргийн захиргааны дарга Николай Калашник мэдээлсэн байна.
Одесс хотод православын сүмийн нутаг дэвсгэр рүү нисгэгчгүй төхөөрөмж нэвтэрч, гал гарчээ. Одоогийн байдлаар хэн нэг хүн гэмтээгүй талаар орон нутгийн захиргааны дарга Олег Кипер мэдээлсэн аж.
Киевийн Голосеевскийн дүүрэгт дроны үлдэгдэл зам дээр унаж, орон сууцны цонхны шил хагарч, дээвэр эвдэрсэн байна. Хотын захиргаа пуужингийн эсрэг хамгаалалт ажилласан гэж мэдээлжээ.
Запорожь хотод орон сууцанд гал гарчээ
Нэгдүгээр сарын 28-ны өглөө ОХУ-ын цохилтод Запорожь хот өртсөн бөгөөд олон давхар орон сууцанд гал гарчээ. Запорожь мужийн захиргааны дарга Иван Федоров “Зуу гаруй орон сууц, 20 орчим автомашин гэмтсэн” гэж мэдээлэв. Түүний хэлснээр, хоёр хүн өртсөн байна.
Харьков мужид зорчигчийн галт тэрэг рүү довтолжээ
ОХУ-ын цэргүүд нэгдүгээр сарын 27-нд Харьков мужийн Языковое тосгоны ойролцоо зорчигчийн галт тэрэг рүү нисгэгчгүй төхөөрөмжөөр цохилт өгчээ. Тухайн үед “Чоп-Харьков-Барвенково” чиглэлд явж байсан тус галт тэргээр 200 гаруй хүн зорчиж байсан аж.
Харьков мужийн прокурорын газраас мэдээлснээр, хоёр дрон галт тэрэгний ойролцоо унаж, гурав дахь нь вагон дээр тусч, гал гарсан байна. Одоогийн байдлаар хоёр хүн нас барсан ч зарим эх сурвалжид дор хаяж таван хүн амь үрэгдсэн гэж мэдэгдэж байна.
Эх сурвалж: DW
