Сар шинийн баяр ойртож буйтай холбоотойгоор мах, цагаан идээ, тавгийн идээ зэрэг баярын гол нэрийн бүтээгдэхүүний үнэ өнгөрсөн оны мөн үеэс мэдэгдэхүйц өсөж, иргэдийн санхүүд бодит хүндрэл үүсгээд байна.
Махны үнэ өссөөр байна
“Хүчит шонхор” захын үнийн мэдээллээс харахад:
- Үхрийн цул мах – 24,000–27,500 төгрөг
- Ястай үхрийн мах – 22,000–23,000 төгрөг
- Үхрийн шинэ мах – 29,000 төгрөг
- Үхрийн өвчүү – 22,000–26,000 төгрөг
- Хонины мах – 13,000–13,800 төгрөг
- Адууны мах – 15,000 төгрөг байна.
Сар шинийн баярын гол зоог болох ууц өнөөдрийн байдлаар 800,000–850,000 төгрөгийн ханштай байгаа нь олон өрхийн хувьд хамгийн том дарамт болж байна.
Тавгийн идээ, цагаан идээ ч үнэтэй хэвээр
- Ул боов – нэг ширхэг нь 6,500 төгрөг
- Сүүн ааруул – 35,000–40,000 төгрөг /кг/
- Хорхой ааруул – 25,000 төгрөг /кг/
- Тавгийн идээний ааруул – 35,000–40,000 төгрөг /кг/
Нэг бүтэн тавгийн идээ бэлтгэхэд дунджаар 350,000–400,000 төгрөг шаардлагатай болжээ.
Иргэд юу хэлж байна вэ?
Сар шинийн бэлтгэлээ базаахад бараа бүтээгдэхүүний үнэ хэрхэн нөлөөлж байгаа талаар иргэдээс тодруулахад тэд дараах байр суурийг илэрхийллээ.
“САР ШИНИЙН БАЯРЫГ ‘УРД ХОРМОЙГООРОО ХОЙД ХОРМОЙГОО НӨХӨӨД’ ӨНГӨРҮҮЛЭХ ШИНЖТЭЙ”
Б.Мөнхцэцэг: Ер нь бараа бүтээгдэхүүний үнэ байнга л өндөр байна. Гэтэл цалин хөлс нэмэгдэхгүй хэрнээ хүнсний үнэ өссөөр. Ийм нөхцөлд сар шинийн баярыг элбэг дэлбэг тэмдэглэх боломж алга. Ёстой л урд хормойгоороо хойд хормойгоо нөхөөд өнгөрүүлэх шинжтэй.”
“ТЭТГЭВРИЙН МӨНГӨӨРӨӨ ГАНЦ УУЦ Ч АВЧ ЧАДАХГҮЙ ШАХУУ БАЙНА”
Д.Ганболд (72 настай): Нас намбаа бодоод ууц тавья гэж бодсон ч үнэ нь тэнгэрт хадчихсан. Бараг нэг сая төгрөг. Тэтгэврийн мөнгөөрөө ганц ууц авч чадахгүй шахуу байхад бусад зардлаа яаж даах вэ дээ.
Худалдаачдын байр суурь
Худалдаачид бараа бүтээгдэхүүний үнийн өсөлтийг зах зээлийн нөхцөл байдалтай холбон тайлбарлаж байна.
Худалдаачин Я.Энхтуяа: Өнгөрсөн оныг бодвол үнэ өссөн нь үнэн. Гэхдээ манай зах бусадтайгаа харьцуулахад боломжийн гэж боддог. Хүмүүс ирээд амсаж үзээд, харж байгаад ‘Дараа авна’ гээд явах нь олон. Аргагүй шүү дээ, авч яваа хэдэн төгрөг нь амьдралдаа хүрэхтэй үгүйтэй байхад авахыг хүссэн ч дийлэхгүй байна.
Үнэ өсөж, орлого гүйцэхгүй хэвээр
Ийнхүү сар шинийн баяр дөхөх тусам хүнсний гол нэрийн бүтээгдэхүүний үнэ өссөн ч иргэдийн цалин, тэтгэвэр нэмэгдээгүй хэвээр байгаа нь баяраа уламжлалт ёсоор тэмдэглэх боломжийг хязгаарлаж, олон өрх “боломжийн хэмжээнд” л бэлтгэл хийхэд хүргэж байна.
Б.АНУ
