Украины Ерөнхийлөгч Владимир Зеленский “Беларусь улс Оросын Холбооны Улсаас хараат байдлаа бууруулах бус, харин улам гүнзгийрүүлж байгаа нь Европ тивийн аюулгүй байдалд ноцтой эрсдэл учруулж байна” гэж мэдэгдэв.
Тэрбээр нэгдүгээр сарын 25-ны ням гарагт Литвийн нийслэл Вильнюс хотноо болсон 1863-1864 оны Нэгдүгээр сарын бослогын ойд зориулсан дурсгалын арга хэмжээнд оролцох үеэрээ ийм байр суурь илэрхийлжээ.
Зеленскийн хэлснээр, өнөөгийн Беларусь улс бодит байдал дээр “Оросын генерал-губернаторын нутаг” болон хувирч, ард иргэдийнх нь эрх, эрх чөлөө тус улсын Ерөнхийлөгч Александр Лукашенкогийн тэжээвэр цагаан шпиц нохойноос ч бага түвшинд очоод байгаа аж.
Беларусь Оросоос улам хараат болж, Европын аюулгүй байдалд заналхийлж байна
Зеленский “2020 онд энэ нөхцөл байдлыг өөрчлөх бодит боломж байсан. Цаашид ч дахин ийм боломж гарна гэдэгт би итгэдэг. Гэвч тухайн үед Беларусийн ард түмэнд үзүүлэх олон улсын дэмжлэг хангалттай байгаагүй.
Одоо Беларусь Москвагаас улам бүр хараат болсны улмаас нөхцөл байдал хичнээн төвөгтэй, өртөг өндөртэй, аюултай болсныг бид бүгд мэдэрч байна” хэмээн онцолжээ.
Тэрбээр Оросын нисгэгчгүй нисэх онгоцны дайралтууд Беларусийн нутгаас хийгдэж байгааг, Беларусийн аж үйлдвэрийн салбар ОХУ-ын Украинд эхлүүлсэн дайныг дэмжин ажиллаж байгааг, мөн тус улсын худалдаа, эдийн засгийн сүлжээгээр дамжин Орос улс зэвсгийн эд анги, хэрэгсэл худалдан авч, улмаар Европ даяар заналхийлж байгааг сануулсан байна.
Тэр “Би Беларусийн ард түмэнд хандаж онцгойлон хэлмээр байна. Та нар бол Европын ард түмэн. Та нар бидний бүх ард түмэнтэй хамт чөлөөт, нэгдсэн Европын нэг хэсэг байх болно. Энх тайван Европт, хүчирхэг Европт” хэмээн мэдэгджээ.
Мөн Зеленский Беларусийн ардчилсан сөрөг хүчнийг дэмжихийг уриалж, Европын орнууд Оросын Украинд эхлүүлсэн дайныг зогсоохын тулд илүү бодитой, шийдэмгий арга хэмжээ авах шаардлагатайг онцолжээ.
ОХУ-ын дайнууд – Дэлхийн томоохон улсуудын хайхрамжгүй байдлын үр дагавар
Украины ерөнхийлөгч “Бидний өмнөх үеийнхэн бидний оршихын төлөө тэмцэж байсан. Өнөөдөр манай ард түмэн хүүхдүүд, ач зээ нар, тэдний үр хүүхдүүд энх тайван орчинд амьдрахын төлөө тэмцэж байна.
Нэг хүн хаа нэгтээ Оросын сэнтийд сууж байхаас илүүтэй, хүн бүр, ард түмэн бүр үнэ цэнтэй байх ёстой. Энэ бол Европын үндсэн зарчим юм.
Хүмүүс чухал. Үндэстнүүд чухал. Соёл иргэншил чухал. Харин ард түмний эсрэг зогсдог Орос түүхийн явцад зайлшгүй ялагддаг” хэмээн онцлон хэлжээ.
Түүнчлэн тэрбээр Оросын Украин, Молдав, Гүржийн эсрэг, мөн Чеченьд явуулсан дайнууд нь дэлхийн голлох улсуудын урт хугацааны хайхрамжгүй, буруу бодлогын үр дүн хэмээн үзэж байгаагаа илэрхийлжээ.
Зеленский “Тэд Орос улсад найдсан. ‘Оростой харилцаагаа дахин эхлүүлэх’ бодлого баримталсан. Гэвч энэ нь эцэстээ бид бүгдийн хувьд хэт ачаалал, хүнд үр дагавар авчирсан. Одоо бид ийм алдааг дахин хэзээ ч давтахгүй байхын төлөө бүхнийг хийх ёстой” гэж мэдэгджээ.
Тэрбээр мөн Давост болсон Дэлхийн эдийн засгийн форумын үеэр Европын орнуудын шийдэмгий бус байдлыг хатуу шүүмжилж, Оросын түрэмгийллийг зогсоохын тулд илүү хатуу, бодитой алхам хийхийг уриалсан байна.
Эх сурвалж: DW
